MEMORIA DOS PROGRAMAS REALIZADOS

NOS CONCELLOS DE: A GUARDA, O ROSAL, TOMIÑO E OIA

A Asociación Érguete Baixo Miño, fundada en xuño do ano 1990, leva a cabo de xeito continuo diversos programas gratuítos de incorporación social e laboral e de prevención no ámbito escolar, familiar, mocidade, redución de danos, xénero e transversais nos Concellos de A Guarda, O Rosal, Tomiño e Oia.

PROGRAMAS ÁMBITO - ESCOLAR:

1.- Educación para a Saúde na Escola e Prevención do Consumo de Drogas na Escola: Estase a desenvolver dende os seus inicios, no curso 1994/95, sendo a escola un ámbito idóneo de intervención para coñecer e apreciar os valores saudables e as normas de convivencia, adquirir habilidades para a prevención e a resolución pacífica de conflitos e valorar a hixiene e a saúde a través duns materiais didácticos que se traballan cos mestres e co alumnado.

 2.- Intervención Socioeducativa na Aula: Como apoio ao programa anterior, realizamos diversos talleres co alumnado de cinco horas de duración como mínimo, para mellorar entre outros aspectos, as súas competencias persoais/sociais, incrementar o seu sentido crítico ou educar en valores como o esforzo ou o respecto.

 3.- Non pasa nada, ¿pasa algo?: Dirixido a adolescentes e as familias traballamos tamén en talleres na escola coa finalidade de evitar o desenvolvemento e a consolidación de consumos problemáticos de drogas e promover a adopción de estilos de vida saudables.

PROGRAMAS ÁMBITO - FAMILIAR:

 4.- Máis que un teito: Programa de prevención familiar que promove unha maior implicación dos pais e nais ou titores como axentes de saúde.

 5.- Entre tod@s: Programa de axuda familiar baseado en intervencións individuais, seguimentos e derivacións a outros recursos.

PROGRAMAS ÁMBITO - MOCIDADE:

 6.- Activa:Facilitamos as instalacións e as ferramentas axeitadas para que a mocidade organice diversas actividades encamiñadas a promover a adopción de estilos de vida e de ocupación do tempo libre saudable.

 7.- Cambio de sentido: Pretendemos mellorar a seguridade viaria entre os mozos/as realizando sesións formativas nas autoescolas xa que moitos estudos coinciden en estimar que o alcohol está implicado entre un 30% e un 50% dos accidentes de circulación.

PROGRAMAS ÁMBITO - REDUCCIÓN DANOS:

 8.- Facilitación de material preventivo: Distribuímos material preventivo para frear a transmisión do VIH/SIDA, hepatite e outras enfermidades así coma fomentar o uso correcto do preservativo nas relacións sexuais, primeira causa de contaxio desta enfermidade hoxe en día.

PROGRAMAS ÁMBITO - XÉNERO:

 9.- Penélope: Resulta cada vez máis eficaz en cada programa ou actividade, poñer atención nas variables de xénero, cuestión avalada pola evidencia científica.

PROGRAMAS ÁMBITO - ACTIVIDADES TRANSVERSAIS:

 10.- Información e Sensibilización: Estas accións en diferentes medios implican á comunidade no desenvolvemento de accións preventivas e como soporte ao resto de actuacións.

 11.- Formación de mediadores sociais: Os mediadores sociais aos que nos diriximos este ano foron os dirixentes de asociacións e entidades deportivas xuvenís da Comarca que cumpren un papel clave dentro da estratexia de prevención comunitaria e como apoio ao resto dos programas: son creadores de opinión, de modelos de actitudes e comportamentos, son animadores e dinamizadores e elementos de conexión entre as distintas institucións.

PROGRAMAS ÁMBITO - LABORAL:

 12.- Incorporación social e laboral: Con actividades formativas como o Curso de Venda no Pequeno Comercio con itinerarios personalizados pretendemos acadar un índice de insercións laborais amplo con persoas en situación e/ou risco de exclusión.

Financiación actividades

Todas estas actividades están financiadas pola Consellería de Sanidade, a Consellería de Traballo e Benestar, a Deputación de Pontevedra, e os Concellos de A Guarda, Tomiño e O Rosal.

Ademais das cotas dos socios/as e outros donativos de Institucións privadas como: Comunidad Montes Goián, Comunidad Montes Curras, Comunidad Montes Santa Mariña do Rosal, La Caixa O Rosal, NovaGalicia Banco A Guarda...